राज ठाकरेंना मोदींचा पाहुणचार

खालील लेख म टा च्या सौजन्याने .....

- ऑगस्टमध्ये आठवडाभर गुजरातचा दौरा

- विकासकामांच्या ब्ल्यू प्रिंटसाठी पाहणी

- संजय व्हनमाने

गुजरातमधील विकासकामे पाहण्यासाठी मुख्यमंत्री नरेंद्र मोदी यांनी मनसे अध्यक्ष राज ठाकरे यांना तब्बल आठवडाभराच्या मुक्कामाचे निमंत्रण दिले असून ऑगस्टच्या पहिल्या आठवड्यात राज गुजरातचा दौरा करतील. राज यांना गुजरातचे सरकारी पाहुणे होण्याचा बहुमान लाभणार आहे. मुंबई महापालिका निवडणुकीसाठी मनसे आपली ब्ल्यू प्रिंट तयार करीत असताना राज यांचा होणारा हा गुजरात दौरा शिवसेनेची डोकेदुखी वाढवणारा ठरणार आहे.

राज ठाकरे नेहमीच गुजरात आणि गुजरातचे मुख्यमंत्री नरेंद मोदी यांची तोंडभरून स्तुती करतात. गुजरातमधील विकासकामांचे ते अनेकदा दाखले देतात. गेल्याच आठवड्यात मोदी यांनी स्वत: राज ठाकरे यांना फोन करून गुजरातला येण्याचे निमंत्रण दिल्याचे कळते. भाजपचे राष्ट्रीय अध्यक्ष नितीन गडकरी स्वत: राज यांच्या दौऱ्याची बारकाईने काळजी घेणार असल्याचे समजते. आठवडाभराच्या या दौऱ्यात राज गुजरातमधील विविध विकासकामे, तेथील शहरांचे नियोजन, विजेच्या समस्येवर केलेली मात, महिला आणि शाळेतल्या मुली यांच्यासाठी दिलेल्या सोयीसुविधा याची माहिती घेणार आहेत.

गुजरातमधील विकासकामांविषयी केवळ ऐकीव माहितीवर भरभरून बोलणारे राज गुजरातच्या दौऱ्यानंतर विकासकामांच्या अधिक प्रेमात न पडले तर नवलच, असा विश्वास गुजरात भाजपमधील पदाधिकारी व्यक्त करीत आहेत. राज यांनी पक्ष स्थापन केला तेव्हा आपल्याकडे सत्ता सोपवल्यास विकासाची ब्ल्यू प्रिंट जनतेसमोर सादर करू, असा शब्द दिला होता. मुंबई महापालिका निवडणुकीपूवीर् आपल्याला मुंबई नेमकी कशी असायला हवी याची ब्ल्यू प्रिंट राज यांना तयार करावी लागणार आहे. साहजिकच गुजरातभेटीमुळे त्यांच्या ब्ल्यू प्रिंटवर गुजरातचा प्रभाव असेल. त्यामुळे हा दौरा भविष्यात शिवसेनेला डोकेदुखी ठरणार आहे.

............

शिवसेनेची प्रतिक्रिया काय?

राज ठाकरे यांना महाराष्ट्रातील भाजपने चहा पाजला तर शिवसेना संतापली. आता नरेंद मोदी राज यांना आठवडाभर सरकारी पाहुणचार घडवणार असल्याने त्यावर शिवसेनेची प्रतिक्रिया कोणती असेल याबद्दल राजकीय वर्तुळात कुतूहल व्यक्त केले जात आहे.